Эр дьон доруобуйатыгар – ураты болҕомтону

Киин сынньанааччыларыгар тыа сирин туруу үлэһиттэрэ: пиэрмэрдэр, сылгыһыттар, тырахтарыыстар уо.д.а. толорулар. Күүстээх үлэ үөһүгэр сылдьар дьон быыс булан быраастарга көрдөрүнэллэрэ күчүмэҕэй, эгэ, сонотуоруйга эбэтэр профилакторийга сынньаныахтара дуо?

Эт киһи элэйэрэ, сыа киһи сылайара ханна барыай? Киһилэрэ ыарыйдаҕына, сылаарҕаатаҕына, чугас дьоно уонна уруулара долгуйан, биһиги Кииммтигэр эбэтэр олорор сирдэринэн нэһилиэнньэ социальнай харалтатын управлениетыгар эрийэллэр. Инньэ гынан чугас киһилэрин олоҕун уһаталлар. Сүрүнэ, кэмигэр сөптөөх сиргэ эрийэн, киһилэрин тылыгар киллэрэн сынньата, эмтэтэ ыытыахха эрэ наада.

Горнай улууһун Орто Сурт олохтооҕо, 74 саастаах Михаил Николаевич Степанов, төһө да биэнсийэҕэ таҕыстар, сылгыһыттыыр. Кини биэ кымыһын оҥорон биир дойдулаахтарыгар батарар.

-- Мин “Абыралга” уонна “Чэбдиккэ” сынньаммытым. Манна дьоҕус буолан, быраастарга көрдөрүү уонна бороссодууралары ааһыы ордук табыгастаах эбит. Олорор хоскуттан таҕыстыҥ да – көрдөрүнэр кэбиниэт, ханна да ыраах хаампаккын, этээстэринэн сүүрбэккин. Кэлэктиибэ да үчүгэй, аҕам саастаахтарга оҕоҕо курдук болҕомтолоохтук сыһыаннаһаллар, наһаа үчүгэй, сылаас эйгэлээх.

Кини биир дойдулааҕа Василий Егорович Стручков 77 саастаах:

-- Улуустааҕы социальнай харалта управлениета ыыппыт биллэриитин көрбүппүт. Миэстэтигэр тургутук толорбуппут. Манна кэлбиппиттэн наһаа астынным.

Чурапчы Дириҥиттэн сылдьар Андрей Андреевич Тарабукин 71 саастаах. Кини өссө Кииммит Островскай уулуссатыгар баар эрдэҕинэ, 2024 сыллаахха, сынньаммыт:

-- Билигин усулуобуйа өссө тупсубут. Островскай уулуссатыгар баар дьиэҕэ сынньаммыппыт кэннэ, биһигини Уулаах Ааҥҥа баар фииалга илдьибиттэрэ. Дьэ, мин онно тута сөбүлээммин, манна иккистээн кэллим. Доруобуйаны хайдах харыстыахха? Элбэхтик хамсаныахха, сатыы сылдьыахха, айылҕалыын алтыһыахха наада. Кэргэмминиин икки улахан оҕолоохпут, 11 сиэннээхпит, икки хос сиэннээхпит.

Биллэн турар, балыыһалары кэрийбэккэ, манна үрдүгэр сытан эрэ быраастарга көрдөрөн баран, тута эмтэнэр быдан табыгастаах. Маны таһынан икки сыллааҕыта манна сынньанарбар саҥа доҕоттордоммутум, билигин да билсэбит, кэпсэтэбит, сибээспитин быспаппыт. Онон атын улуустарга элбэх киһини кытта билистим. Бу соторутааҕыта эрэ Кэбээйигэ олорор табаарыспын кытары кэпсэттим. “Манна кэлэн эрэбин” диэбиппэр киһим “хаарыаны, мин үлэбэр тахсан хааллым” диэн ымсыырда.

8 914 271-00-88 нүөмэргэ эрийэн суруйтара охсуҥ!