Саас – хааччах буолбатах! Аҕам саастаахтар бизонарийга айанныыллар.

Хаҥалас оройуонугар “Уус Буотама” питомнигар сөҕүмэр улахан бизоннар “олохсуйбуттара” 20-чэ сыл буолла. Канадаттан Саха сиригэр аҕыйах бизон кэлбит эбит буоллаҕына, төрөөн-ууһаан, билигин 40-ҥа тиийэн, бүтүн ыстаадаҕа кубулуйда.

Кыһыл кинигэҕэ киирбит кыыллары Булгунньахтаах сэлиэнньэтигэр баар Уһун үйэлэнии киинигэр сынньанааччылар кэрэхсии-сэргии көрөллөр.
Саха сиригэр сэдэх кыылы тыыннаахтыы ким илэ көрүөн баҕарбат буолуой? Олор ортолоругар олох араас охсуутун көрсүбүт аҕам саастаахтар бааллар. Холобур, Уус Алдан улууһуттан төрүттээх, 65 саастаах Александра Николаевна Бурцева үһүс төгүлүн инсуллаабыт. Санаа күүһэ барытын кыайар: биир сиргэ олорон хаалар табыллыбатын өйдүүр. “ Бизоннары көрөн улаханнык сөхтүм. Уһун үйэлэнии киинэ бу ураты түгэни бэлэхтээбитигэр махтанабын. Маннык сирдэргэ сылдьан, кэми кытта тэҥҥэ хардыылаан иһэр курдук сананабыт, бэйэбитигэр саҥаны-сонуну арыйабыт. Булгунньахтаах айылҕата, чахчы, олус кэрэ эбит. Бу кэрэни көрөргүтүгэр баҕарабын”, – диэн санаатын үллэһиннэ.
Кинини экскурсия дьиҥнээх сулуһа – 87 саастаах Елизавета Авксентьевна Федотова – өйөөтө. Елизавета Авксентьевна Кэбээйиттэн сылдьар. Ытык сааһыгар үктэммит кырдьаҕас бөлөххө бастакынан суруйтарбыт. “Маннык айаҥҥа үгүстүк сылдьар кыаҕым суох. Онон бу миэхэ суолталаах түгэн буолла. Биһигини мотуорканан илдьибиттэрэ. Экскурсия кэнниттэн кыргыттар сөтүөлээбиттэрэ. Уһун үйэлэнии киинигэр бу курдук сынньанабыт, бэйэ-бэйэбитин кытта алтыһабыт уонна айылҕа барахсантан күүс-уох ылабыт,” – диэн кэпсээтэ.
Ойуур сөҕүмэр улахан кыылларын үгүстэр бастакыларын көрдүлэр. Нам улууһуттан кэлбит, 76 саастаах Аксинья Афанасьевна Ноговицына Булгунньахтаахха баар Кииҥҥэ аан бастаан сынньанар. “Урут бизоннар тустарынан улахан өйдөбүлэ суох этим. Бизонарийга айаммыт олус интэриэһинэй буолла”, – диэтэ.
Бу айан Саха сирэ хайдахтаах курдук кэрэтин, уратытын кэрэһилиир. Ону таһынан, киһи барахсан күүстээх санаатын туоһулуур. Сааһы хааччах оҥостубакка, харгыска-хааччахха бэриммэккэ, мотуордаах оҥочоҕо олордулар да – баҕа санааларын хоту айаннаатылар.
Ытык дьоммутун холобур оҥостуоҕуҥ!

Булгунньахтаахха баар Уһун үйэлэнии киинигэр +7 914 822-38-74 эрийэн суруйтарыҥ.

Бизоннары ЯСИА хаартыскаҕа түһэрдэ.