Истиҥ эйгэлээх Булгунньахтаах филиала

Хаҥалас улууһун Булгунньахтааҕар бэрт истиҥ эйгэ олохтоммута. Филиал администратора Ньургуйаана Тобохова кэпсииринэн, сынньанааччыарбыт тыыннаах кэпсэтиини, үөлээннээхтэри кытары атыһыыны олус суохтаабыттар.

Манна хас биирдии күн туһалаахтык барар. Сарсыарда аайы эти-сиини хамсатар эрчиллиилэр. Күнүскү өттүгэр – эмтиир бороссодууралар, билиини биэрэр оонньуулар уонна маастар-кылаастар. Нэдиэлэҕэ үстэ муусукаҕа дьарык, отчуоттуур кэнсиэргэ бэлэмнээн, үҥкүү дьарыктара бараллар. Нэдиэлэҕэ биирдэ тыа сирин уопсастыбаннай баанньыгар сылдьаллар.

Билигин халлаан сөрүүдүйэн, таһырдьа мээнэ тахсыбаттар, ол иһин дьиэ иһигэр бириэмэни туһалаахтык, көрдөөхтүк атаараллар. Далбар хотуттарбыт чымадаан муҥунан мааны таҥастарын аҕалбыттар уонна күҥҥэ иккитэ таҥастарын уларытан, бырааһынньык эйгэтин үөскэтэллэр.

“Бу сезоҥҥа икки эрэ эр киһи баар, онон кинилэр, бу бэйэлээх мааныны, кэрэни көрөн, харахтарын сымнаталлар”, -- диэн Ньургуйаана Семёновна күлэн этэр.

Дьарыкка уонна кэнсиэргэ олохтоохтор, учууталлар, балыыһа үлэһиттэрэ үөрүүнэн кэлэллэр, аҕам саастаахтары өйүүллэр. Кинилэргэ бу Киин номнуо иккис дьиэ кэриэтэ буолла, манна кэлэн, саҥа дьону кытары билсэллэр, сонун дьарыкка кыттыһаллар.

80 саастаах Екатерина Ивановна Шадринова кэлэктиипкэ умнуллубат сынньалаҥы бэлэхтээбиттэригэр махтанар. Кини манна 94 саастаах эдьиийин кытары кэлбит. “Наһаа астынныбыт. Сибиэһэй салгын, күҥҥэ түөртэ олус минньигэс, натуральнай аһынан аһаталлар, эмтэнии, илбийии, тупсаҕай дьиэ, барыта ып-ыраас, сып-сырдык. Өссө, биллэн турар, тыыннаах кэпсэтии туһаҕа эрэ барда, олус сэргэхсийдибит, бэйэбитин эдэр курдук сананныбыт, ыарыыбытын да умнан кэбистибит”, -- диир кини.

“Мин манна аан бастаан Бүлүү улууһуттан кэллим. Барытын наһаа сөбүлээтим. Араас туһалаах бороссодууранан уонна үөрэтэр дьаһалларынан олохпутун уһаттыбыт”, -- диир 74 саастаах Владимир Прокопьевич.

Манна улуус уонна нэһилиэк дьаһалтатын кытары түһэрсиллибит сөбүлэҥинэн хас сезон ахсын олохтоох бэтэрээҥҥэ биир путевканы буор босхо бэлэхтиир үтүө үгэс баар.

Дьэ, маннык буолар уһун үйэлэнии кистэлэҥэ: ырыа-үҥкүү, үчүгэй хампаанньа, кыһамньы уонна болҕомто. Хайа да сааска кырасыабай курдук сананарга дьулуһуу.

Сиһилии маннык нүөмэрдэргэ эрийэн билсиҥ: Дьокуускайга - 89142710088, Булгунньахтаахха - 89148223874, Нерюнгрига - 89963154189.