Эдэрдэргэ сүбэлиибит

Дьокуускайга баар Көхтөөх уһун үйэлэнии киинигэр бастакы сезон бэрт сэргэхтик түмүктэннэ. Манна өрөспүүбүлүкэ араас муннугуттан кэлбит сынньанааччыларбыт ыкса бодоруһан, уруккуттан билсэр дьон курдук, биир дьиэ кэргэн буолан хааллылар. Кинилэр бу умнуллубат сынньалаҥнарын өр кэм истиҥник саныахтарыгар саарбахтаабаппыт. Иван Петрович Дмитриев, Нам улууһа, 84 саастаах: - Миигин манна кыыһым бэрийэн ыыппыта. Олоҕум тухары элбэх сиргэ уонна элбэхтик үлэлээн кэллим. Арааһа, мин өрөспүүбүлүкэҕэ бүтэһик дьаам сүүрдээччи буолуом. Хаҥалас улууһугар икки атынан почтаны Батамайтан Сиинэҕэ диэри таһарым (37 км). Оччолорго хаһыат күн аайы тахсара, билиҥҥи курдук нэдиэлэҕэ биирдэ эрэ буолбатах. Онтон тырахтарыыс-машинист үөрэҕэр үөрэммитим, комбайнерунан тиийэ үлэлээбитим. Биэнсийэҕэ тахсыахпар диэри бостуугунан үлэлээн кэлбитим. Мин эдэрдэргэ уһун үйэлэнэллэригэр чөл олоҕу туһалларыгар, күн ахсын сэрээккэни оҥороллоругар сүбэлиибин. Мин санаабар, бу аныгы сайдыылаах үйэҕэ киһи сүүс сааһыгар тааҕы-таах тиийиэн сөп. Билигин урукку курдук сут-кураан суох – маҕаһыыҥҥа саха санаабатаҕа барыта кыстанан турар дии! Саамай кылаабынайа – үөрэ-көтө үлэлиэххэ наада, оччоҕуна ас да баар буолуоҕа! Вячеслав Гаврильевич Николаев, Чурапчы улууһа, 67 саастаах: - Мин отуттан тахса сыл учууталлаабытым. Билигин бочуоттаах сынньалаҥҥа тахсаммын кэтэх хаһаайыстыбабын көрөбүн: сүөһүлээхпит, сылгылаахпыт. Кыргыттарым бары улаатан, үөрэхтэнэн, мин туйахпын хатаран учууталлыыллар. Үс сиэннээхпит. Мин бу Көхтөөх уһун үйэлэнии киинин туһунан улуустааҕы социальнай харалта управлениетыттан билбитим. Онно кэргэним сирдээн ыыппыта. Бэйэм дьүлэйбин, инбэлииттээхпин. Эдэргититтэн доруобуйаҕытыгар болҕомтолоохтук сыһыаннаһыҥ диэн сүбэлиэм этэ. Бу нүөмэрдэргэ эрийэн сиһилии Киини билсиҥ. Дьокуускайга үлэлиир филиал: 8914-271-00-88; Булгунньахтаах филиала: 8914-822-38-74, Нерюнгрига: 89963154189