Булгунньахтаахтан истиҥ эҕэрдэ!

Быйылгы сылга биһиги кииммит филиалыгар – Булгунньахтаахха бастакы сезон үлэтэ түмүктэннэ. Элбэх киһи куорат дьалхааныттан сынньана таҕыста. Көй салгын, ураты кэрэ айылҕа, уу-чуумпу тыа сирин олоҕо куорат олохтоохторун филиал саҥа арыллыаҕыттан угуйар. Манна сайынын эрэ буолбакка, кыһыннары эмиэ сибиэһэй салгыҥҥа дьаарбайыы, Хаҥалас улууһун ураты бэлиэ сирдэригэр экскурсиялар ыытыллаллар уонна, биллэн турар, манна биир дьиэ кэргэн курдук ураты истиҥ сыһыаҥҥа куустаран, бириэмэни билбэккэ, туһалаахтык атаараллар. Ол курдук, үгэс буолбут экскурсиялардаахпыт – Улахан Ааҥҥа “Дьөһөгөй оҕото” түмэлгэ, Александр Самсонов – Айыы Уола түмэлигэр сылдьыы. Киин иһигэр сынньалаҥ бырагырааматыгар – нейрогимнастика, өйү эрчийэр дьарыктар, араас маастар-кылаастар, остуол оонньуулара уонна да атын тэрээһиннэр киирсэллэр. Маннык сынньалаҥы биһиги ыалдьыттарбыт олус сөбүлүүллэр. Февралина Юрьевна Тоноева, 78 саастаах: - Бу Көхтөөх уһун үйэлэнии Булгунньахтаахха баар “Утум” филиалыгар оскуолаҕа бииргэ үөрэммит дьүөгэбинээн Галина Николаевна Аввакумованы кытары кэлбитим. Манна дьиэ иһинээҕи ураты эйгэ олохтоммут диэн бэлиэтии көрдүм – эйэҕэс сыһыан, истиҥ кэпсэтиилэр, саҥа арыйыылар – бу барыта бириэмэни биллэрбэккэ, туһалаахтык атаараллар. Уон күммүт олох биллибэккэ элэстэнэн ааһан хаалла. Элбэх кинигэ, сурунаал баар. Бэйэбит сканворд, остуол оонньууларын, оҥоһуктарбытын илдьэ кэлбиппит. Астара олус минньигэс уонна тотоойу. Массаж, чэбдигирдэр бороссодууралар – барыта наһаа үчүгэй! Александра Николаевна Шеломова, Чурапчы улууһа, 87 саастаах: - Бу Көхтөөх уһун үйэлэнии киинигэр иккистээн сынньанным. Манна өссө сайын кэлэ сылдьан олус сөбүлээбитим, ол иһин аны кыһынын көрүөх баҕам баһыйбыта. Арааһа, үһүстээн эмиэ кэлэрим буолуо. Бу филиал мин ис турукпар наһаа барсар, сирэ-уота, айылҕата да ураты кэрэ, Өлүөнэ эбэни өҥөйөн олоробут. Манна үлэлиир кыргыттар наһаа маладьыастар, үөрэ-көтө сылдьаллар, амарах сүрэхтээхтэр, истиҥ сыһыаннаахтар, биһигини оҕолорун курдук бүөбэйдииллэр. Барыта ып-ыраас, сып-сырдык, уурбут-туппут курдук, олус минньигэс астаахтар. Үөлээннээхтэрбин кытары алтыһан астынным, эдэрбэр төннүбүт саҕа сананным. Түмэллэргэ сылдьан бэрт үгүһү, саҥаны биллибит. Уопсайынан, чуҥкуйар диэн тугун олох билбэтибит. Бу нүөмэрдэргэ эрийэн сиһилии Киини билсиҥ. Дьокуускайга үлэлиир филиал: 8914-271-00-88; Булгунньахтаах филиала: 8914-822-38-74, Нерюнгрига: 89963154189