Тускар туһан

Невролог быраастар ньиэрбэ систиэмэтин араас кэһиллиитин эмтииллэр. “Аврора” мэдиссиинэ килииньикэтин Көхтөөх уһун үйэлэнии киинин бырааһа Полина Кудрина 30-тан тахса сыл неврология уонна геронтология эйгэтигэр үлэлиир.

Кини мэтиэдьикэтигэр когнитивнай гимнастиканы күүскэ туһанар: саастаах киһи мэйиитигэр уонна өйүгэр эрчиллиилэри оҥорторор.

Ити эрчиллиилэргэ улахан тарбах үлэтин көҕүлүүр ньыманы туһанаргытыгар ыҥырар. Онтубут маннык: улахан тарбах төбөтүн оргууй аҕай аллара тардан сытыараҕын Тарбах төбөтүгэр билогическай көхтөөх туочукалар бааллар, ону уһугуннаран хамсаттахха, мэйии үлэтигэр, ордук өйгө-санааҕа (память) үчүгэйдик дьайар. Маннык хамсаныыны 20—30 сөк. устатыгар оҥоруохтааххын.

“Илии уонна мэйии сибээһэ “атахтаһар”: уҥа илии хаҥас хос мэйиини (полушарие), оттон хаҥас илии – уҥа хос мэйиилиин. Биһиги тарбахтарбытын хамсаттахпытына, мэйиибит хаҕын моторнай уонна сенсорнай зоналара эрэ буолбакка, болҕомто уонна өй иһин эппиэттиир учаастактара эмиэ үлэлииллэр. Бу зоналары сотору-сотору хамсата, үлэлэтэ сырыттахпытына, нейроннай сибээстэри үчүгэйдик уһугуннарар, үлэлэтэр, кыра моториканы тупсарар уонна сааһырыы бэрээдэгинэн кэлэр когнитивнай мөлтөөһүнү эрдэттэн сэрэтэргэ олус улахан суолталаах. Улахан тарбахтан ураты, мэйии үлэтин харыстыырга кыра моториканы үлэлэтии эмиэ туһалаах: быластылыынынан эбэтэр туойунан сыбаан оҥоруу, пазллары таҥыы, кыра биридимиэттэри бэрээдэктээһин, баайыы эбэтэр иис. Хас да араас эрчиллии көрүҥүн холбоотоххо, түмүгэ өссө ордук буолар”, - диэн кини быһаарар.

Көхтөөх уһун үйэлэнии киинин cиһилии маннык нүөмэрдэргэ эрийэн билсиҥ: Дьокуускайга - 89142710088, Булгунньахтаахха - 89148223874, Нерюнгрига - 89963154189.